DIA DAS BIBLIOTECAS ESCOLARES… NA NOSA BIBLIOTECA

Xa sabedes que o pasado 24 de outubro foi o Día das Bibliotecas Escolares, e como xa vos contei en anteriores entradas, no cole preparamos actividades especiais e concursos que fixeron de onte un día moi especial.

Soou o timbre do fin do recreo e os voluntarios puxéronse en marcha. Cumprindo co seu labor foron na procura de tódolos nenos do cole para que acudiran á Biblioteca xunto cos seus mestres. Como vedes estabamos todos xuntos na nosa Biblioteca!

Os nenos aplicáronse a fondo durante estas últimas semanas e tanto pequenos como maiores participaron nos diferentes concursos con moitas gañas.

Tanto os cativos de infantil como os de 1º ciclo esmeráronse moitísimo na decoración das súas Bibliotecas de aula e custou moito decidir o primeiro premio do “I Concurso de Decobiblio”.

Estes foron os participantes:

Algúns nenos en representación de cada clase recolleron orgullosos os diplomas honoríficos.

E mesmo nos contaron como o fixeron!

E… o 1º Premio foi para… a clase de 5º de Educación Infantil.

Os maiores de 2º e 3º ciclo foron unha gran sorpresa para todos, xa que traballaron arreo e elaboraron uns libros moi fermosos, que poderedes ver máis polo miúdo na Biblioteca. A través deles amosáronos a súa visión de “Que é unha Biblioteca para ti?”

Eles tamén recolleron os seus diplomas:

Léronnos os seus traballos…

E… o 1º Premio foi para… a clase de 5º de Educación Primaria!

Non nos cabe a menor dúbida de que repetiremos esta experiencia, xa que non só gozaron dunha tarde divertida na Biblioteca, senón que tódolos mestres e máis eu recoñecemos que nos deixaron gratamente sorprendidos.

Parabéns a todos!

Deica pronto. Lémonos

LEO

CARDENOS DE BITÁCORA

Xa están listas as novas aportacións aos Cadernos de Bitácora das mochilas viaxeiras.

Dende logo que estades a traballar e sobre todo dicides que o estades a pasar moi ben con elas, eso nótase!

Familia Pérez Durán (4º Infantil)

Familia Amorín López (5º Infantil)

Familia Dominguez Gabian (6º Infantil)

Familia Corbal Benitez (1º Primaria)

Familia Moreira Suárez (2º Primaria)

Familia Leins Amorín (3º Primaria)

Familia Bruña Pacheco (4º Primaria)

Familia González Vidal (6º Primaria)

E por certo… eu vou tomando nota das vosas impresións para as próximas mochilas!

Lémonos.

LEO

DÍA DAS BIBLIOTECAS ESCOLARES

O vindeiro 24 de outubro conmemoraremos o Día das Bibliotecas Escolares.

Dende a “Biblio do cole” queremos promover estas dúas actividades: “Decobiblio” e “Que é unha biblioteca para ti?”

Na primeira participará o alumnado de Infantil e Primeiro Ciclo, e consistirá na preparación especial dos recantos das clases dedicados á sección de aula da Biblioteca. Cada clase traballará na decoración, ambientación, coidado… deste espazo. Xa se están a ver cousas moi fermosas.

A segunda, pensada para 2º e 3º ciclo, é unha actividade de creación literaria na que poderán presentar contos, ilustracións, poesías, adiviñas… nas que nos amosen a súa visión do que é (ou debe ser) unha Biblioteca.

Xa vos contaremos máis cousas estes días.

Tamén vos deixo aquí o cartel que enviou a Asesoría de Bibliotecas escolares para o fomento das súas posibilidades.

A autora é Marina Seoane.

 

Un saudiño, lémonos,

LEO

OS PRIMEIROS CADERNOS DE BITÁCORA

E por fin... xa chegaron as miñas “patiñas” os primeiros cadernos de bitácora das mochilas viaxeiras.

Hai debuxos e reflexións moi xeitosas. Dende logo que esta iniciativa está a funcionar!

Mirade, mirade…

Comezamos polos pequenos de infantil:

Familia Doallo Alonso (4º Infantil)

Familia Cal Gómez (5º Infantil)

Familia Adán Moreira (6º Infantil)

E tamén os nenos de primaria fixeron as súas aportacións...

Familia Pérez Durán (1º Primaria)

Familia Cerdeira Cortizo (2º Primaria)

Familia Vidal Durán (3º Primaria)

Familia Blanco Paz (4º Primaria)

Familia Fahlbusch (6º Primaria)

Lémonos.

LEO

NÓS NON SÓ LEMOS LIBROS… FACEMOS LIBROS!

Ídesme notar ben orgulloso dos nenos do cole nesta nova que vos quero achegar.

Xa vai un tempo, case 3 anos, que se achegou ao cole o escritor Carlos Rodríguez Dacal e propúxonos a aventura de escribir e crear ao redor do “Carballo de O Pelete”. Aínda que xa sei que esta árbore é moi coñecida, dicirvos que se trata dunha árbore senlleira de A Lama que dende xeracións pasadas alimenta lendas e festas que se chegaron ata os nosos días.

Os nenos fixérono tan ben e esforzáronse tanto que ao final Carlos non foi quen de elixir e tódolos traballos foron publicados!

Ademais temos grandes poetas e poetisas no cole!

Participamos no concurso “Érase un día unha poesía”. As poesías de Moisés Rodríguez, María Bruña, Nerea Francisco e Ainoa Casal, foron as elixidas!

Non deixedes de lelas, son moi divertidas! Tamén tedes o libro na Biblioteca!

Parabéns a todos!

Lémonos!

LEO

COMEZAN A SÚA VIAXE!

 

 

Saen dende a Biblioteca as novas mochilas viaxeiras cargadiñas de historias e diversión.

Nacen con ganas de unificar dous piares básicos dos pequechos: a lectura e a familia.

Cada aula ten unha para que semana a semana vaia pasando por todos os nenos.

Creo que non esquecín nada: un libro para os nenos, un para os papás, unha peli, algo de música… e algunha sorpresiña que non vos vou desvelar.

O que sí vos podo contar é que en cada unha atoparedes un “caderno de bitácora” para que cada familia deixe a súa pegada. Logo poderedes velas todas no Blog.

Espero que vos guste a todos!

Lémonos.

LEO

COMEZAMOS DE NOVO!

Cantas ganas tiña de volver a estar con todos!

O verán fíxoseme moi longo ao estar eu só na Biblioteca, aínda que me fixeron algunha visitiña...

Como tiven moito tempo, preparei moitas novidades para este novo curso. Non quero adiantar moito pero... de seguro que vos vou sorprender!

Estes días ando moi ocupado poñendo a Biblioteca en marcha e presentándome aos nenos novos e as súas familias, aos que quero darlle en especial unha calurosa benvida.

Non me vou entreteñer máis que soa o timbre para a "Hora de Ler".

Un saudiño. Lémonos.

LEO