DÍA DAS LETRAS GALEGAS 2016!

Unha xornada dedicada ao día das nosas letras, o Día das Letras Galegas. Este ano homenaxeamos ao poeta Manuel María.

Dirixímonos a praza da Lama coa fin de facer chegar as súas verbas máis aló das paredes da escola.

 

Cada ciclo, logo da investigación, foi preparando nos días previos unha chea de actividades: retratos, biografía, cantigas, poemas, ilustracións...

Comezamos cos alumnos de primeiro ciclo que nos foron descubrindo con datos do escritor un retrato xigante que realizaron os nenos de Infantil. Logo foi a quenda de 3º, 4º, 5º e 6º que recitaron os poemas do autor que máis lle gustaron.

Por último, os pequechos cantaron un poema musicado que atoparon na rede realizado polos compañeiros do IES As Barxas (https://vimeo.com/164895450).

Lémonos.
LEO

PREMIOS OUFF ESCOLA 2015

No día de onte tivo lugar en Ourense a entrega de premios aos traballos finalistas, na VI edición do certame de cinema OUFF Escola 2015. Esta convocatoria nace co obxectivo de impulsar o uso do idioma galego entre a mocidade, coñecer a visión desta sobre a súa contorna sociocultural e fomentar a creatividade audiovisual e máis o traballo en equipo nunha linguaxe atractiva para o alumnado, que contribúa a formar un espírito crítico. Este certame pretende, ademais, potenciar o uso das tecnoloxías da información e da comunicación nos centros de ensino, e crear un espazo de referencia para a mostra do audiovisual feito nas aulas.

Nesta sexta edición do certame participaron un total de 136 proxectos e máis de 2.300 rapaces, mostra dos bos resultados da promoción que procura o fomento da creación audiovisual na infancia e na adolescencia, e que ademais nos ilusiona a grandes e pequenos. Este ano presentamos catro traballos: “Os superpoderes dos alimentos” en Educación Infantil, “Ecoclínica” de primeiro e segundo de primaria, “Da horta ao prato” de terceiro e cuarto de primaria e “Hortoconsellos” dos nenos de quinto e sexto de primaria.

Fomos galardoados cun primer premio na categoría de infantil e primaria polo traballo de Educación Infantil “Os superpoderes dos alimentos”. O premio supón unha dotación económica de 600 euros, e sobre todo unha ledicia inmensa que viviron os nosos cativos, e que nos emocionou a todos!

 

Queremos trasladar a tódolos participantes e aos premiados os nosos parabéns polo traballos realizados, así como agradecer a organización a súa mención.

Parabéns rapaces!

E para os que non vistes a nosa curta… https://vimeo.com/128374250

Lémonos,
LEO.

ALÓ POLO DÍA DAS LETRAS GALEGAS!

Este ano, para festexar o Día das Letras Galegas, saímos fóra... quixemos facer chegar as verbas máis aló das paredes da “Biblio”, da escola... saímos á alameda do pobo é rodeados de moitos curiosos que nos quixeron acompañar, pasamos unha xornada moi especial.

 

Día das letras galegas 2014 VER PRESENTACIÓN DESCARGAR TODO

Traballamos nas aulas a figura do homenaxeado, Xose María Díaz Castro, e como fora escritor de poesía... quixemos compartir as nosas, e agasallar á xente do pobo co noso particular tendal de poesías!

Non podiamos rematar o día sen repetir a experiencia do Rastro de Libros. Coma na anterior ocasión, os libros que expurgamos da nosa biblioteca chegan ás rúas da Lama cun prezo simbólico, e coa finalidade de darlle unha nova vida a estes fondos!

Seguro que repetiremos a experiencia…

Lémonos…
LEO!

PDI “RÍOS E PRAIAS EN BOAS MANS”– Visitamos as dunas de Corrubedo

Dentro das saídas programadas no Proxecto Documental deste ano xurdiu a oportunidade de visitar co alumnado de 2º e 3º ciclo o Complexo Dunar de Corrubedo, e as Lagoas de Vixán e Carregal. Alba de 6º déixanos esta crónica para “O Recanto de Leo”.

“O día 14 de novembro, xoves, algúns profes e os cursos 3º,4º,5º e 6º fomos de excursión ao Complexo Dunar de Corrubedo e ás Lagoas de Vixán e Carregal. Saímos do cole ás 9.00 da mañá e chegamos ao Parque Natural de Corrubedo ás 11.00 aproximadamente. Alí, un guía, contounos moitas curiosidades: como se forman as dunas, que paxaros habitan nelas… e mentres nos explicaba, ensinaba as fotos nunha pantalla na que tamén nos puxo un vídeo.

Píllara, paxaro que habita nas dunas.

A continuación fomos dar un paseo polo Parque no que había moitos sinais como: prohibido cans, non acampar, non facer fogueiras, etc. O guía díxonos que camiñáramos con coidadiño porque podía haber ovos no chan, que os podíamos pisar porque están camuflados, e que estiveramos atentos por si viamos algún. Por desgraza non encontramos nada e non vimos paxaros porque a maioría saen de noite. Sen saír dos sendeiros de madeira, chegamos a un alto onde había un burato enorme, paramos e o guía explicounos que antigamente había un mineral chamado golfrán que era moi caro e extraíano de alí. Despois chegamos a unha praia que estaba moi moi sucia e contaminada, ata había un pobre golfiño morto que acabou abalado alí e moitas máis cousas que os humanos tiramos ao mar e contaminan. Para finalizar a mañá, o guía levounos a un museo precioso no que había moitas cousas interesantes relacionadas co Parque: maquetas, aparellos de pesca, carteis informativos, cunchas, e moitas cousas máis. Cando rematamos a visita, comemos uns bocatas e marchamos do Parque cara o miradoiro da Ra. Dende alí observamos vistas extraordinarias, víanse as Lagoas de Vixán e Carregal e toda a marisma. Finalmente visitamos a GRAN duna móbil e un faro que rodeamos para ver mellor e admirar as vistas dende el. Sacamos moitísimas fotos e cando chegamos á casa contámoslle aos nosos pais o que fixeramos ese extraordinario e divertido día. A DUNA MÓBIL A duna móbil deste espazo, aberto entre as rías de Arousa e a de Muros e Noia, ,resalta polas súas dimensións. Máis dun km de lonxitude e 20 metros de altura e entre os 200 e 250 metros de ancho, aínda que antigamente disque era meirande. Figura que a finais do século XIX superaba os 60 metros de altura. A duna é longa e tendida coma o lombo dun animal, derrúbase pola banda de sotavento, cara a terra, e sen vexetación que a conteña, avanza pola chaira a unha velocidade de dous ou tres cm. cada ano. LAGOAS DE VIXÁN E CARREGAL Vixán, a lagoa doce, aliméntase das augas do modesto regato Muíño, suxeito a oscilacións de caudal estacionais. Carregal, a lagoa salobre, comunícase co Océano dividíndoa en dous: a longa praia fronte aos cons denominados Pedras da Ferreira. É esta canle do mar pola que circulan as mareas un dos puntos centrais do Complexo de Corrubedo. Alba Amoedo Cal

A súa compañeira Vanessa Reis Courtine deseñou este cartaz que vos presentamos, para concienciar á xente de que non se pode deixar todo ciscado.

Tamén podedes ver na seguinte galería de imaxes unha mostra de todo o que puideron vivenciar.

(Grazas a tódolos autores polas fotos!)

AS DUNAS DE CORRUBEDO VER PRESENTACIÓN DESCARGAR TODO

Un saudiño, lémonos,

LEO

PDI: RÍOS E PRAIAS EN BOAS MANS

Na fase de motivación do PDI deste ano: “Ríos e praias en boas mans”, os cativos de infantil e os rapazolos de 1º ciclo de Primaria fomos a Lourido a mariscar!

Estas mulleres do mar amosaron aos nenos as fases do seu traballo, os aparellos que empregan, as duras xornadas que teñen que facer, a subida e a baixada da marea, as medidas mínimas das capturas, a importancia do coidado da praia e do río (xa que todo vai parar alí)...

Unha xornada que temos que agradecer especialmente a Concelleira de Educación do Concello de Poio, Alicia, que nos brindou os lazos para con elas, nos axudou moitísimo na organización da saída e que tan ben se portou con nós.

Comezamos na praia, vendo ás case 400 mariscadoras (e algún mariscador) que alí estaban, e moi atentos fomos recollendo a información e experimentando coas nosas propias mans.

Apañamos marisco e... fomos á confraría a pesar e separar a nosa captura. Explicáronnos que logo hai que levalo a depuradora e á lonxa.

Un día de marisqueo VER PRESENTACIÓN DESCARGAR TODO

Ufff... canto traballo e canta información!

Moitas grazas a todas elas pola súa atención!

Lémonos. LEO.

SEGUINDO COA INVESTIGACIÓN… “PDI: AS ENERXÍAS SOSTIBLES”

O pasado venres, 1 de marzo, tivemos unha nova saída investigadora para procurar información sobre a temática do noso Proxecto: “As Enerxías Sostibles”.

Nesta ocasión tocáballe a quenda á Enerxía Solar, e sabedores de que no concello de Portas había unha empresa (www.inteledesolar.es) que organizaba visitas para escolares, alí fomos cos alumnos de Educación Infantil e Primeiro Ciclo de Primaria, xa que o resto do cole iría o luns, 4.

Só podemos ter palabras de agradecemento para eles, que tan ben nos acolleron, e tan boas explicacións nos deron sobre o aproveitamento da Luz Solar e a súa conversión en Enerxía Eléctrica e Calorífica.

	A sesión comezou cunha explicación e rolda de preguntas nunha cuberta solar experimental, onde fan as probas dos distintos tipos de placas e transformadores, para poder ofertar aos clientes os produtos máis eficientes. Alí aprendemos a diferenciar entre as placas fotovoltaicas e as térmicas; as primeiras produtoras de electricidade, e as segundas para quentar auga.

Máis tarde nos dirixiron a outra instalación próxima na que continuamos a recibir moitos datos sobre a Enerxía Solar, e ate tivemos a oportunidade de tocar unha placa fotovoltaica.

Unha das preguntas que xurdiu, e que nos resolveron axiña, foi: “De que material están feitas?” Resulta que o Silicio é o máis importante para a produción de placas xeradoras de electricidade.

Outra dúbida importante era se a electricidade que se producía xa se podía empregar directamente para enchufar un ordenador ou calquera outro aparello doméstico. E tamén nos explicaron que non, que era precisa una transformación, para converter a corrente en alterna, xa que a que produce a placa é continua (como a das pilas), ademais de ser precisa a transformación da voltaxe a 220 voltios.

Como todos estes conceptos se nos escapaban un pouquiño, nós quedámonos con que a corrente que saía da placa entraba nun aparello e saía del preparada para o seu uso nas nosas casas.

 

Outro factor importante era o de saber a corrente que se subministraba á rede, para o que a instalación contaba cun contador que rexistraba produción e o consumo.

A verdade é que alumnos e profesores quedaron contentísimos coa visita, xa que foi moi proveitosa.

Agardo que a vós tamén volo pareza.

Un saúdiño, lémonos,

LEO