DIA INTERNACIONAL DA MULLER – 8 de marzo

Como xa vos viñeramos contando, este ano quixemos celebrar o Día Internacional da Muller con dúas persoas moi especiais.

Ángela Abad e Bea a de Estrella compartiron connosco uns momentos preciosos, de experiencias e encontro cos nosos cativos. Momentos de solidariedade e de expresión a través da música...

  

Como grandes profesionais que son nos seus campos: a logopedia e a imaxe e o son respectivamente, puideron facer visible para o alumnado unha vez máis que non existen profesións de mulleres e de homes, e como lles recalcou Bea, "non deben de deixar de soñar" e traballar moito para que este soño se cumpra.

O mini-concerto na biblioteca foi moi entrañable, e todos, rapaces e maiores, gozamos de momentos moi intensos e emocionantes.

  

A tarde rematou coa firma de autógrafos, dos que quedaron moitos pendentes pola falta de tempo. Bea prometeu algunha sorpresa que anda a argallar e que poderemos ver moi pronto.

  

Un inmenso pracer poder compartilo con vós, lémonos,
LEO

DIA DA MULLER TRABALLADORA

Xa se aproxima a conmemoración do Día da Muller Traballadora, 8 de marzo.

Este ano imos contar coa presenza de Bea a de Estrella e Ángela Abad. O obxectivo deste encontro é continuar visibilizando o traballo de tantas excelentes profesionais que nos demostran que non existen oficios de homes e de mulleres, senón persoas que se desenvolven no seu.

Bea é técnica de imaxe e son e traballa no Consello da Cultura de Galicia, e Ángela atende o seu propio gabinete logopédico.

Baixo o selo da Produtora BeArt acaban de editar o disco, "Mar de fóra", co que Bea se estrea en solitario como cantautora e Ángela na produción executiva.

A súa conciencia solidaria levounas a colaborar coa asociación Agaefa, de afectados de acondroplasia e familiares, doando unha porcentaxe do prezo do disco á mesma.

O noso alumnado leva un tempo coñecendo o seu traballo e está impaciente por poder compartir con elas unha tarde.

Agardamos que vos gustara a canción que presentamos na anterior entrada do blog, lémonos,
LEO

DÍA DA MULLER TRABALLADORA DENDE OS OLLOS MÁIS CATIVOS

O 8 de marzo festexamos no centro o Día da Muller Traballadora: reflexións, debuxos, coloquios… para os maiores, e para os nenos de infantil e 1º ciclo unha tarde ben distinta, como non na biblioteca!

Os cativos de 3 anos retáronnos a ver se adiviñabamos os oficios deixándonos ben clariño que tanto son para homes coma para mulleres.

“Adiviñas o oficio?” VER PRESENTACIÓN DESCARGAR TODO

Seguiron os de 5º de Infantil que aprenderon poemiñas que comezaban por: “Se a miña nai fora…”

"Se a miña nai fora..." VER PRESENTACIÓN DESCARGAR TODO

E un pouquiño de música que non falte! Os alumnos de 6º de Infantil chegaron a ritmo de rap para amosar a súa forma de ver un mundo baixo a igualdade.

"Somos iguais!" VER PRESENTACIÓN DESCARGAR TODO

Quedaban por actuar os nenos de 1º ciclo que representaron unha obra á que titularon “Que fai mamá antes de durmir?”

"Que fai mamá antes de durmir?" VER PRESENTACIÓN DESCARGAR TODO

Ben cousiñas aprendín!

Lémonos. LEO.

DÍA INTERNACIONAL DA MULLER TRABALLADORA

Como xa sabedes o pasado día 8 de marzo conmemorouse a nivel internacional o Día da Muller Traballadora, e como se nos xuntou cos días do Entroido ,decidimos trasladar a súa celebración para o pasado venres.

Ademais de estar a falar e tratar o tema nas aulas, na Biblioteca tamén quixemos facer algo especial.

Pola tarde xuntámonos todos a escoitar e aprender da man da figura feminina máis entrañable de tódalas familias: as avoas.

Invitamos á nai dunha mestra do cole, amosounos como o paso do tempo foi cambiando a sociedade na que vivimos e a visión da mesma sobre a muller.

Cada palabra estaba chea de recordos e anédotas que aos oídos dos nenos semellábanse contos imposibles, que a algún lle fixo soñar…

Mesmo trouxo fotografías daqueles tempos onde puidemos ver como se traballaba daquela e… como aínda hoxe segue a traballar!

Os nenos prepararon preguntas nas aulas que logo tiveron resposta coa avoa Inés.

 

Día internacional da muller traballadora VER PRESENTACIÓN DESCARGAR TODO

Unha experiencia que quixo dar a importancia que se merece á muller dentro da sociedade, e sobre todo o respecto e a valoración aos nosos maiores. Unha actividade chea de valores e contidos, non só para os nenos, se non para tódala comunidade educativa.

Mirade cantos netos lle saíron… que non, son os alumnos de 2º , que non dubidaron en facerse unha foto coa nai da profe Andrea!

Moitas grazas avoa Inés, moitas grazas polo teu tempo e a túa entrega!

Lémonos. LEO.