O CEIP “A LAMA” NO CULTURGAL 2015

Esta fin de semana celebrouse no Pazo da Cultura de Pontevedra a Feira Culturgal 2015.

O CEIP “A Lama” puido contar coa representación dos mestres Cris e Rafa, que foron convidados a presentar a experiencia de creación audiovisual que se está a desenvolver na nosa escola cunha pequena charla titulada: “ESTRATEXIAS DE CREACIÓN AUDIOVISUAL NA ESCOLA DO SÉCULO XXI”, dirixida principalmente a profesorado de ensino non universitario.

Fotos: Seso Durán

O relatorio estivo precedido dun Obradoiro de Creación Audiovisual desenvolvido polo profesor do IES “As Barxas”, de Moaña, Seso Durán. No CEIP “A LAMA” sabemos do seu bo facer, xa que o curso pasado puidemos gozar coa súa presenza nas actividades que anualmente desenvolvemos no colexio, enmarcadas no Plan de Formación Permanente do Profesorado. O universo creativo dos cativos da Lama fíxose presente a través das personaxes das curtas de animación: “Os Panchos”, “A Escaleira”, “A Vella Lulula”, “Ranilda”, “Monstruito”…

Un saúdiño, lémonos,
LEO

HORTOCONSELLO 2

Hoxe vos deixamos a segunda entrega dos Hortoconsellos, produción do alumnado de 3º ciclo, xunto coas mestras Ana Isabel Loureiro e Raquel Sánchez.

Agardamos que vos guste, lémonos,
LEO

TERCEIRA ENTREGA DAS PRESENTACIÓNS DO PDI

Desta volta o alumnado de 2º ciclo de primaria presenta o vídeo que elaboraron coas mestras: Andrea Lafuente, Marta Couso, Luisa Cancelas e Mónica Fernández.

Co título “Da semente ao prato” fai un percorrido polo traballo realizado durante meses por estes rapaces no desenvolvemento do seu PDI.

DA SEMENTE AO PRATO from CEIP A LAMA on Vimeo.

Agardamos que vos guste.

Un saúdo, lémonos,
LEO

COMEZAN AS PRESENTACIÓNS DO PDI!!!

Despois dun tempo de intenso traballo, (e un pouco ausentes) velaí van…

As creacións audiovisuais dos nosos cativos estanse a presentar nesta última fase do PDI: “Sementa ideas, recolle futuro!”.

Esta primeira entrega titulada “Ecoclínica”, e producida polas mestras Irian Blanco e Tere Couto, quere contar os efectos beneficiosos para o noso organismo que podemos atopar en hortalizas e legumes.

ECOCLÍNICA from CEIP A LAMA on Vimeo.

Agardamos que vos guste!!!

Un saúdo, lémonos,
LEO

SUPER PEPO E CLEMENTINA

Velaí vai unha segunda entrega do noso súper heroe favorito.

Super Pepo e Clementina from CEIP A LAMA on Vimeo.

Chega da man de María Luisa, delegada en Pontevedra da ONG “Mans Unidas”, coa que colaboramos este ano polo “Día Escolar pola non Violencia e a Paz”, e que está desenvolvendo un proxecto en Uganda para axudar a mellorar a economía familiar implantando a agricultura sostible.

Este segundo encontro tamén lles trouxo aos nosos cativos unha sorpresa moi especial. Os diplomas que lles foron outorgados pola súa colaboración: “A capa verde de Súper Pepo”.

Un saudiño, lémonos,
LEO

PRESENTACIÓN DO CARTAZ TESOUROS BIOLÓXICOS DO RÍO GAFOS II

Onte foi presentado na nosa biblioteca o cartaz "Tesouros Biolóxicos do Río Gafos II", elaborado pola Asociación Vai Polo Río de Pontevedra. A edición foi posible grazas á colaboración da comunidade educativa da Lama, que lles fixo entrega dos cartos recadados no IV Rastro Solidario que con motivo do Día Escolar da non violencia e da Paz organizáramos o 30 de xaneiro de 2014. Esta segunda edición do cartaz ve a luz logo dun ano de traballo, e conta cunha nova selección de especies vexetais e animais que se poden atopar no Río Gafos dende o seu nacemento ata a desembocadura na ría de Pontevedra. Os encargados da súa presentación foron os membros da asociación Gonzalo Sancho, Amancio Castro e Pablo Carro, que durante unha hora foron explicando a importancia biolóxica de cada unha das especies escollidas nesta ocasión. Durante o acto tamén puidemos contar coa presenza de Daniel Vidal, da Asociación Cultural Río Barbeira da Lama. O Proxecto "Ríos e Praias en Boas Mans" de Voz Natura, foi o marco no que o alumnado do centro realizou unha investigación sobre o coidado destes ecosistemas e a colaboración con "Vai polo río" e a "Asociación Río Barbeira" de A Lama o xeito de pór na práctica esas aprendizaxes adquiridas.

Queremos agradecer a disponibilidade dos nosos convidados e a ilusión con que tomaron o proxecto e a nosa colaboración.

Un saúdo, lémonos,
LEO

ONTE VISITOUNOS… AMFIV

Onte recibimos no cole unha visita moi especial e interesante. Da man de Santiago Álvarez (papá de Iago, alumno de 6º ) viñeron ao cole cinco xogadores do equipo AMFIV (www.amfiv.com), un clube deportivo de Vigo que conta xa con trinta anos de historia rompendo barreiras, e dez xogando na elite deste deporte.

Viñeron a explicarlle aos nosos cativos que era o baloncesto en cadeira de rodas, as súas diferenzas e similitudes, as peculiaridades das normas, as características das cadeiras para xogar, a historia do seu clube, e a súa propia historia persoal!

Achegámonos a unha realidade que viven moitas persoas día a día e que eles nos fixeron visibles coas súas testemuñas.

Logo fomos ao pavillón onde puidemos velos en acción no campo, e onde os nenos de 2º e 3º ciclo probaron as cadeiras vivenciando a experiencia dende dentro. Fixeron carreiras, pases, pequenos partidos, mesmo encestaron... nas gradas, pequechos e mestres animaron sen parar!

Foi unha xornada que non esqueceremos, na que aprendemos moito e gozamos de tan boa compañía.

Moitas grazas a Santi por darnos a idea e grazas a Karol, Chema, Filipe, Santi e Natxo pola vosa lección.

Un saúdo, lémonos,
LEO

(Por certo, tamén valeu para que unha reivindicación que levabamos anos facendo se fixera realidade. O cole xa ten polo menos unha entrada que suprimiu as barreiras arquitéctónicas. Agora queda que lle dean o remate final e lle coloquen unha barandilla de seguridade.)

COMEZAMOS A EXPOÑER… FASE DE PRESENTACIÓN DO APRENDIDO!

Despois dun intenso curso, traballando arreo no noso PDI, chega a última fase: a presentación do aprendido.

Ao longo da última semana tódolos alumnos e mestres fomos escoitando, observando, experimentando, descubrindo... os diferentes traballos de investigación dos nosos compañeiros; e do mesmo xeito, expoñendo o noso propio.

Hoxe queremos presentarvos unha parte do labor dos máis cativos; os nenos de infantil.

Neste ciclo comezaron a exposición os de 6º de infantil, que entre outras actividades, investigaron a cerca das persoas que teñen a cotío nas súas mans os nosos río e praias: “As mariscadoras e os pescadores”.

Reunidos na nosa biblioteca escoitamos con moita atención todo o que aprenderon con axuda da súa presentación coa que nos agasallaron!

Velaí vos deixamos o seu caderno de recollida da información.

Moi pronto iremos compartindo máis traballos de tódolos cursos!

Lémonos. LEO.

PABLO DÍAZ PRESENTA O SEU NOVO DISCO TOC TOC NO CULTURGAL

Ola rapaces! Unha nova moi fresquiña.

O pasado domingo, 1 de decembro, Pablo Díaz presentou no Culturgal (Pontevedra) o seu libro-cd TOC TOC.

Os nosos reporteiros puideron tomar unhas imaxes do concerto de presentación no que Pablo, acompañado pola súa banda, fixo as delicias de cativos e maiores repasando os novos temas e os do anterior álbum Tic Tac. Ao rematar o concerto, Pablo e Olga estiveron asinando os libros, e como non, O Recanto de Leo tróuxose a súa dedicatoria. Nesta ocasión a edición corre a cargo da editorial Galaxia e as ilustracións son de Nuria Díaz.

E como non!!! Xa está na nosa biblioteca.

Un saúdiño, lémonos,

LEO