A LAMA SPRING SHOW - I FEIRA DE EXHIBICIÓN

O 12 de xuño celebrouse na escola a I Feira de Exhibición do traballo de Alfabetización Mediática e Informacional desenvolvido durante o curso.

"A Lama Spring Show", fixo as delicias de pequenos e maiores... pensándoo ben, máis de maiores; que se puxeron as botas no show cooking "Sabores do Mundo" preparado polo alumnado de 2º ciclo.

"Da horta ao prato" foi a presentación do PDI do alumnado de Educación Infantil e desenvolveuse na sala central da Biblioteca.

Os de 3º ciclo prepararon unha demostración de tódolos recursos da nosa Biblioteca Creativa e Radio na Biblio, ademais do programa Edixgal e recursos de Polos Creativos. Esta parte desenvolveuse nos Laboratorios da Comunicación, Creativo e de Radio da Biblioteca.

E os de 1º ciclo fixeron a súa presentación do PDI "Entre Costuras", no escenario do Salón de Actos. Todo un repaso pola historia da moda e a súa pegada no medio ambiente.

Tamén tivemos unha gran sorpresa: visitounos "A Vella Lulula", un pouco máis maiorciña, pois xa pasaron máis de 10 anos dende a súa gravación.

CONSELLOS PARA UNHA HORTA SOSTIBLE

O alumnado de Educación Infantil recolleu moita información durante a súa investigación sobre os cultivos. Neste vídeo podemos ver uns consellos para poder ter unha horta sostible.

TIPS_HORTA from O Recanto de Leo on Vimeo.

RECURSOS PDI ENTRE COSTURAS

En 1º ciclo crearon unha serie de materiais para afianzar o investigado e que o alumnado puidera traballar distintos contidos.

Aquí vos deixamos unha mostra en PDF do caderno de traballo que despois elaborou cada alumno.

- Descargar PDF -

DE ROTEIRO POLO RÍO XESTA

Dentro da investigación sobre os ODS decidimos facer unha ruta de sendeirismo que nos levaría a mini central hidroeléctrica do río Xesta.

Puidemos coñecer de primeira man o impacto que pode ter unha fonte de enerxía sostible, porque aínda que limpa, non deixa de ter a súa pegada.

TRALOS PASOS DO XESTA from O Recanto de Leo on Vimeo.

CALENDARIO DE TEMPADA

Un dos documentos que elaboraron os pequenos e pequenas de infantil foi este calendario de tempada, onde se recolle mes a mes que produtos da horta se colleitan. A información a procuraron na web https://soydetemporada.es. Cada cativo levou o seu para casa, pero un ben grande o empregaron na fase de presentación do seu PDI e agora cola no corredor de Ed. Infantil. En cada páxina hai un código QR que enlaza cun audio que gravaron na radio da biblio coa verdura ou hortaliza que quixeron destacar, aínda que descubriron que cada mes podía haber 5 ou 6 propias. A conclusión máis importante é que se consumes produtos de tempada contaminas menos, pois non os hai que transportar dende tan lonxe. Introducimos pois logo o concepto de alimentos Km 0, que nos leva outra vez ao lema do seu PDI "Da horta ao prato".

CALENDARIO from O Recanto de Leo on Vimeo.

Aí van unhas fotos durante a elaboración.

CON+CIENCIA

Esta actividade que se desenvolveu durante o noso Proxecto tivo por obxectivo que o alumnado coñecese as características e propiedades da auga a través da observación, a experimentación e a manipulación.

Cada equipo tivo que preparar un pequeno experimento baseándose no método científico para despois presentarllo ao alumnado de Educación Infantil do centro.

Os experimentos escollidos foron: Pementa fuxitiva, A auga que non cae, Néboa nun vaso, Cóctel de cores, Fonte de auga e Debuxos animados con auga.

CON+CIENCIA from O Recanto de Leo on Vimeo.

OBRADOIRO DE TECIDOS NATURAIS

Desta volta vos deixamos unhas imaxes que nos entrega o 1º ciclo. Durante a súa investigación arredor da pegada que deixa a industria téxtil puideron gozar no obradoiro sobre tecido e tinguido natural: o liño.

LINO from O Recanto de Leo on Vimeo.

TELEXORNAL 3 CICLO

O alumnado de 3º ciclo fixo un pequeno noticieiro empregando o croma e o telepromter.

Tamén unha entrevista á Chus, nai de Diego de 6º e dona do Aliprox, supermercado da Lama, que nos explicou moitísimas cousas cobre as embalaxes no sector da alimentación e a cantidade de plástico que se emprega.

TELEXORNAL_3_CICLO from O Recanto de Leo on Vimeo.

KM SOLIDARIOS

O 26 de abril celebrouse o Día da Educación Física na rúa.

Non quixemos perder a oportunidade de enlazalo co noso PDI e organizamos a I Carreira Solidaria do CEIP A Lama.

Cada participante tiña que facer a doazón de 1 Kg/L de comida ou produtos de hixiene, que logo doamos aos servizos sociais do Concello da Lama.

Foi todo un éxito de participación.

KM_SOLIDARIOS from O Recanto de Leo on Vimeo.

CONECTAMOS CON IVA SON LI, DENDE NOVA YORK

Hoxe puidemos gozar de novo cun obradoiro de Biblioteca Creativa da man de Paola Guimeráns e Iva Son Li, que se conectou con nós dende Nova York.

Desenvolvimos unha actividade de aprendizaxe de linguas e STEAM coa placa Makey Makey.

ECOPREGUNTOIRO

O alumnado de 6º volveu participar no Ecopreguntoiro de Radio Voz. Estreamos a nova radio da Biblilteca para conectar coa emisora de Carballo, onde se atopaban os conductores do programa.

OS RECREOS NA BIBLIO

Logo da estrea da nova biblioteca parece que a normalidade acabou de volver de todo. Os cursos anteriores, con protocolo COVID, non nos permitiron moitas das actividades ou rutinas comúns. Agora é un verdadeiro pracer ver como podemos volver gozar dos recantos, da interacción entre as persoas, da convivencia entre os distintos niveis.

Nas seguintes imaxes un exemplo dun recreo calqueira deste mes de febreiro.