ENTREGA DE PREMIOS DO CONCURSO NACIONAL DE BOAS PRÁCTICAS 2011

(…si, dicimos ben, 2011)

E por fin chegou o día no que poder gozar cos demais compañeiros premiados do acto de entrega dos galardóns do Concurso Nacional de Boas Prácticas para a Dinamización e Innovación das Bibliotecas dos Centros Escolares 2011!!!

O día comezou ben cedo, xa que o avión para Madrid saía ás 6:50 da mañá dende o aeroporto de Vigo. Destino: a Biblioteca Nacional de España, institución que acollía o acto. A verdade é que, a pesar do tempo transcorrido dende a consecución do premio ate hoxe, a emoción que todos tiñamos non minguou un ápice. Lembraredes que a finais de novembro de 2011 publicabamos unha entrada no blog titulada: “Que boa nova!”, na que dabamos conta do premio obtido…

Pois hoxe tocaba recibir o diploma acreditativo…, xuntarse cos demais galardoados…, poder dirixir unhas palabras a tódolos presentes…

E chegou o momento esperado!

Ao seren o colexio que recibira o 1º Premio na categoría A (Centros de educación Infantil, Primaria, Especial e para Adultos), dende a Dirección Xeral de Avaliación e Cooperación Territorial do Ministerio de Educación pedíronsenos unhas palabras en nome de tódolos premiados que participaron xunto con nós.

E iso foi o que tentamos: dar voz aos nosos sentimentos, que pensabamos que coincidían co sentir da maioría dos presentes. Unha das nosas preocupacións era deixar ben claro o orgullo que sentimos pola Rede de Bibliotecas Escolares de Galicia, e por formar parte dese gran proxecto educativo en común, que a pesares dos problemas que poidan ir xurdindo, será sempre o piar da innovación educativa no noso país.

Velaí os estamos! Os máis de 500 centros que participamos no Plan de Mellora de Bibliotecas Escolares de Galicia!

(A TVG fíxose eco onte no informativo do mediodía)

http://www.crtvg.es/informativos/educacion-premia-seis-bibliotecas-escolares-galegas-por-innovadoras-483778

Unha  aperta ben grande e sentida para todos vós!

Lémonos,

LEO

O PDI XA ESTÁ EN MARCHA! “AS ENERXÍAS SOSTIBLES”

O Proxecto Documental deste ano xira en torno ás Enerxías Sostibles, e no cole xa estamos inmersos nas distintas fases de desenvolvemento.

Unha das iniciativas que implantamos dende que comezamos esta andaina é a de expoñer nun lugar ben visible da biblioteca tódolos fondos e recursos que adquirimos relacionados co tema a investigar.

Trátase dun espazo temático no que os nosos cativos teñen acceso directo aos libros, DVDs, revistas, maquetas, xogos… que lles axudarán a convertirse en verdadeiros “expertos”. Durante o mes de outubro estiveron en exposición, pero agora xa os están a empregar, tanto nas clases como no traballo que fan na biblioteca. O proceso de adquisición non é sinxelo, pois moitas veces os documentos que atopamos sobre a temática non se adaptan ás idades dos nosos alumnos.

A variedade de soportes e xéneros ten que estar presente, polo que nos podemos atopar cunha narrativa que ten como fío as Enerxías Sostibles, ou un manual, un xogo interactivo para ordenador…

Este ano mercamos unha maqueta de madeira dunha casa sostible, que conta con tódolos elementos dun fogar comprometido coa natureza: placas solares, separación de lixo, aproveitamento da auga da chuvia, xenerador eólico… Tamén vimos de incorporar uns xogos científicos que pensamos que axudarán a comprender mellor a transformación das distintas enerxías (solar, eólica…) en electricidade, e outros que axudan a fomentar a reciclaxe, a depurar auga, a reutilizar…

En outra entrada vos amosaremos unha nova iniciativa, que unida a esta nos axudará a comprender mellor o mundo da sostenibilidade.

Vos adianto que se trata dun recanto para recortes de prensa ao que chamamos “Noticias Sostibles”.

Lémonos,

LEO

E SEGUIMOS CO SAMAÍN…

Unha das actividades coa que máis gozan as nosas familias ao longo do ano é o “Concurso de cabazas e cestas de outono”.

Tétricas, simpáticas, modernas, clásicas… todas elas recolleron a admiración dos cativos e dos profesores, que prepararon unha “especial” entrega de premios con diplomas para os participantes e agasallos para os gañadores.

Velaí van outras fotiños da entrega de premios. A ver quen recoñece ao “secretario” da “Noiva Cadáver”…

O certo é que pasamos unha boa velada, e puidemos gozar das dotes interpretativas dos novos profes, (e dos non tan novos…)

Un saúdo, lémonos,

LEO

10 ANOS DE EDUCACIÓN AMBIENTAL

Aló polo mes de marzo deste ano, cumpríronse 10 anos dende que comezou a colaboración entre a nosa escola e Antonio Membrives, o noso Axente Forestal.

Con tal motivo, e por festexarse en A Lama a “plantación oficial” polo Día da Árbore, elaboráramos un vídeo con fotos deses 10 anos de traballo, e que aquí vos deixamos.

Imaxes de plantacións, solta de troitas, charlas, visitas aos medios de extinción aereos…

Lémonos,

LEO

UN CONTO DE MEDO PARA… PASALO DE MEDO!

Chegado o tempo do Samaín e Magosto, dende o Recanto queríamos aportar algunha sorpresa... coa axuda das “super-voluntarias” preparamos un conto terroríficooooo...

O primeiro que fixemos foi ver quen tiña o suficiente valor para non morrer de medo e contar a historia para o resto do cole na hora de ler.

Entre todos buscamos e rebuscamos contos, cómics, poesías... que foran axeitadas para tal acontecemento. Despois de lelos todos, as nosas rapazas da biblio decidiron contar: “Fiz, o coleccionista de medos” de Fina Casalderrey e Teresa Lima.

Aínda que con pouco tempo... tiñan moito que preparar: voces misteriosas, efectos de son, pausas inquietantes, susurros tétricos... e a verdade e que o resultado deixou a máis de un coa boca aberta!

E por se alguén quedou con gañas de máis aquí vos deixamos a curta de animación da editorial OQO.

 

Lémonos,

LEO

OS VELLOS TEMPOS…

A finais do curso pasado os alumnos de 6º de primaria rodaron unha curtametraxe que titularon “Os vellos tempos”. Agora que está a piques de saír a edición impresa vola deixamos aquí para o voso deleite. Non temos máis palabras!

Xa nos contaredes!!!

Lémonos,

LEO

E UN MÉRCORES MÁIS… CADERNOS DE BITÁCORA!

Ver álbum completo

Rapaces estade ben atentos xa que hai Mochilas Viaxeiras que cambian os seus documentos!

Lémonos. LEO

TROBADORES POR UN DÍA!

Non sei se vos lembrades que tempo atrás, por mor do Día das Bibliotecas Escolares, os nosos cativos convertéronse en escritores de poesías. As súas creacións xa van chegando pouco a pouco ao equipo de redacción deste blogue.

Hoxe, os nenos de 6º de Infantil serán os protagonistas, xa que se converteron en trobadores por un día. Tiñan que explicarnos “Que é unha biblioteca para ti?” e... tras a tea estaban eles recitando os seus versos!

 

Que é unha biblioteca? e do que imos a falar así que estade ben atentos que isto vai comezar! O meu avó sempre dixo que a mellor maneira de viaxar é un libro non precisas dun avión na biblioteca hai libros a montóns. Dende un rato detective ata un superheroe invencible canto máis leo máis aprendo e o mundo mellor entendo. Teatro, contacontos ou exposicións nunha biblioteca hai moita acción só teremos que estar caladiños cos ollos abertos e ben sentadiños. As películas divertidas podo ver non me quitan as ganas de ler, que grande se ve todo síntome coma se fose un piollo! Para poder escoitar música non hai que ir á discoteca pon os cascos nas orellas e goza na audioteca! Os xogos do ordenador son do mellor pero só os podemos coller unha vez ao mes. Tamén hai un recanto para crear con pinturas, papeis e moito máis, anímate e comeza a debuxar nun gran artista te converterás.

E se as nosas obras queres coñecer as producións propias podes ver colgadas en ganchos na parede están agardando a que as admiredes. E as mochilas viaxeiras que grandes compañeiras pasan connosco unha semana enteira. Así podemos gozar de lecturas en familia con papá e mamá e cando ao cole deben regresar o caderno de bitácora poderás amosar. E se queres estar ao día ó Recanto de Leo vai de visita só con prender o ordenador terás un montón de información. Buscade, buscade e a ver que atopades hai fotos a montóns adiviñades de quen son? E non podedes esquecer que a columna do PDI tes que ver chea de libros, pelis e ata xogos nela atopamos respostas para todo. Este curso toca estudar enerxías sostibles e como aforrar, parece un tema complexo verás ao final canto aprendemos. Alumnos de 6º de infantil

Non vos preocupedes que o temos todo gravado en video… pronto o veredes!

Lémonos. LEO.

HORA DE LER EN 1º CICLO

Continuando coa dinamización da Hora de Ler, os alumnos de 1º ciclo seguen recibindo a visita dos seus pais.

Nesta ocasión, Miguel veu contarlles un conto moi especial. O seu fillo Saidou naceu en África, nun país que se chama Burkina Faso, por iso podemos ver na cartolina o mapa que elaboraron para que nos puideramos situar.

O relato popular que nos trouxo titúlase “O Guepardo, o Mono e o Camaleón”.

Saidou, logo de buscar contos sobre África na nosa biblioteca, decantouse por escribir el un conto co que entreter aos seus compañeiros.

Agardamos que esta iniciativa siga tendo boa acollida entre as familias.

Un saúdo, lémonos,

LEO

CADERNOS DE BITÁCORA!

Non podemos deixar pasar unha semana sen vos amosar os traballos da Mochila Viaxeira!

Ver álbum completo

Lémonos. LEO

ALÓ POLO 24 DE OUTUBRO… UN INVITADO MOI ESPECIAL!

Cando celebramos no cole o Día das Bibliotecas Escolares, entre outras actividades, quixemos ter unha sorpresa para cos nosos cativos.

O poeta Carlos Fontes veu pasar con nós a tarde e compartir unhas lecturas dos seus libros: Poemas con piruleta e Versos en flor.

Había moitas preguntas que facerlle: “Cando comezou a escribir?”, “Por que escribe poesía e non outro xénero?”, “Cal é a súa poesía favorita?”...

Carlos, con moita paciencia, foi contestándonos a todos e entre pregunta e pregunta, líanos algunha das súas poesías ou lle líamos algunha das nosas composicións.

Unha tarde de poesía VER PRESENTACIÓN DESCARGAR TODO

Despois dun encontro así… as voluntarias agasallaron ao invitado cun bolígrafo, non vaia ser que non teña con que seguir escribindo!!!

As súas dedicatorias andan agora de clase en clase...

“E como tiña que ser,
falando de poesía,
pasamos nós o día,
e quedamos en nos ler…”

LEO

DÍA DAS BIBLIOTECAS ESCOLARES–QUE É UNHA BIBLIOTECA PARA TI?

Unha das actividades que preparamos para o Día das Bibliotecas Escolares foi: Que é unha biblioteca para ti?

Este ano, a través da poesía, os nosos pícaros tiveron que contarnos que entendían eles por biblioteca. Os de 3 anos deixáronnos este vídeo do seu traballo basado na canción de Pablo Díaz “O Libro”, publicada por Kalandraka no libro – disco TIC TAC.

Agardo que vos guste moito.

Lémonos,

LEO

CADERNOS DE BITÁCORA!

Para que poidades ver o ben que traballades!

Ver álbum completo

Unha aperta rapaces!

LEO.